قصيدة خنفشارية بس تعالو على باب الجرح

على باب الجرح دك جفك بسجين واعرف دكتك وافتح شراييني
لان فيما مضى للروح جنت الروح ومكانك سابقا مابيني وبيني
تاخرت بمجيئك وينك من سنين؟ يالمسلب شبابي بحالي خليني
ذبل ورد المحنه ومات بيه الشوك تمنيتك كبل مو هسه تسكيني
جوعانه السنين ويوم ياكل يوم عصرن ماي عمري وشربن سنيني
جفت وجهي الملامح والفرح مختاض وجه خيط الصبر يم نار سجيني
واكل عيني السهر كمت احلم احلم بيك ولا طارش وصل منك يواسيني
قفل بابه الكلب لا لا تمر خطار والموكد طفه ونامت فناجيني
ومشيت بلايه خطوه وكاعي تنضح خوف عثرت بذكرياتك باقيه بطيني
جنت مثل السطح مكشوف كلي وياك ضنيتك سمه وتفهم مضاميني
وضكت مر الحقيقه بكاس من صدمات من ايدك جنت كل ساعه ترويني
وكبل سوطك قلم والظهر جان اوراق كتبت فوكي قصايد لسه تاذيني
وتطشرني المصيبه واسكر ابلواي وتلملمني المصايب وارجع لديني
وكلت خبز السوالف شفتي ويه شفاك وبس ملح السوالف واكف بعيني
انه عيني بصيره والجفوف طوال ما اذل للعنب وارفعله جفيني
صح ضكت العنب بس هو ينزل جان بضميرك ياعنب هم كتلك انطيني ؟
انه سوالف قديمه وحسجه الشياب ويمر وجهك حداثه يريد يلغيني
تضحكني شوكت وانه ابجي عمري الراح ما امشي بعد خلف اليبجيني
نذرت كلبي اذبحه بيوم بي انساك وهسه انت افتهم هاليوم اسدد ديني